Остварена средба на раководствата на стопанската комора на македонија и грчката бизнис асоцијација

Share on facebook
Facebook
Share on twitter
Twitter
Share on linkedin
LinkedIn
Share on email
Email
Share on telegram
Telegram

Претседателот на Стопанската комора на Македонија, Бранко Азески, оствари работна средба со Арис Влахос, претседавач со Грчката бизнис асоцијација во земјата и Георгиос Ланцас, член на Одборот на Асоцијацијата.

Грчката бизнис асоцијација е првата формирана асоцијација на грчки претпријатија во Северна Македонија, основана во Скопје на 26 јуни 2020 година. Целта на делувањето е да ги штити и унапредува финансиските и професионалните интереси на нејзините членки, односно најголемите грчки компании во земјата. Во таа линија, намерата е дополнително да се развиваат односите меѓу деловните заедници на Грција и Северна Македонија.

Претседателот Азески го изрази своето задоволство што ќе има можност да соработува со новооснованата Грчката бизнис асоцијација и ги нагласи силните врски меѓу Комората и претпријатијата со грчки капитал во земјата.

На средбата меѓу раководството на двете организации се дискутираше како да се подобри соработката меѓу двете земји во поглед на деловните активности и како да се прошири таа соработка и на регионално ниво. Двете страни изразија поддршка за секторски пристап во развојот на меѓусебните односи и економските активности и искажаа подготвеност да иницираат и да работат на заеднички проекти во интерес на нивните компании-членки.

Влахос и Азески заеднички заклучија на следната нивна средба да работат на конкретизирање на целите за кои има меѓусебна согласност и интерес, со јасно дефинирани активности од кои ќе се испорачаат придобивки за бизнисите во двете земји.

Hellenic Business Association