Со симболичен чин на потпишување на гасоводните цевки од страна на претставници на Владата, меѓународните партнери и институциите вклучени во реализацијата, беше означен почетокот на изградбата на гасниот интерконектор меѓу Северна Македонија и Грција – стратешки енергетски проект со кој земјата добива нов правец во обезбедувањето на сигурно, стабилно, диверзифицирано и еколошки одржливо снабдување со природен гас, што има клучно значење за енергетската иднина на земјата и регионот.
Настанот се одржа во близина на Неготино и Демир Капија, на локацијата на трасата од каде започнува изградбата на македонскиот дел од интерконекторот, во организација на НОМАГАС АД Скопје – државната компанија која управува со националниот гасоводен систем.
Изградбата на интерконекторот беше поздравена од претседателот на Владата, Христијан Мицкоски, кој истакна: „Ова не е само инвестиција во цевки и бетон, туку уште еден значаен влог во енергетската независност и стабилност на земјата, во нејзиниот целокупен економски развој и во нејзината просперитетна иднина. Преку реализацијата на овој проект, како и најавените поврзувања со гасоводните системи на останати наши соседи, нашата земја станува значајна енергетска крстосница, што очекувам дека ќе донесе конкретни придобивки за целиот регион, а пред се за македонските граѓани и домашната економија“.
Почетокот на изградбата на интерконекторот беше поддржан од бројни меѓународни партнери и дипломати, што уште еднаш ја потврди важноста на проектот. Меѓу говорниците кои се обратија на настанот беа претставникот на Европската инвестициска банка (ЕИБ), Бјорн Габриел, шефот на Канцеларијата на Европската Банка за обнова и развој (ЕБОР) во земјата, Фатих Туркменоглу, амбасадорката на САД, Анџела Агелар, амбасадорката на Грција, Софиа Филипиду, како и амбасадорот на Европската Унија, Михалис Рокас. Сите ја поздравија изградбата на интерконекторот како проект од заеднички интерес и симбол на регионалната соработка и европската интеграција.
„Гасоводниот интерконектор помеѓу Северна Македонија и Грција е проект со далекусежно влијание и со голема економска трансформативна моќ за регионот. Тој директно придонесува кон енергетската политика на Унијата, обезбедувајќи разноврсно и стабилно снабдување со енергија, подобрувајќи ја енергетската отпорност на ЕУ и земјава. Со оваа стратешка точка на прекугранично поврзување, ЕУ ја поттикнува побрзата интеграција на регионот во Европскиот енергетскиот пазар, каде што Северна Македонија заслужено припаѓа“, рече амбасадорот на ЕУ, Рокас.
Амбасадорката на САД, Анџела Агелер, порача дека партнерствата со пријателите и соседите се докажувaат дека се многу поважни од бирократски и политички маневри. – Оваа регионална соработка ќе овозможи независност и снабдување со енергенси во регионот, рече Агилер. Истакна дека овој проект е стратешка инвестиција во безбедноста, просперитетот и суверенитетот, го зајакнува економскиот развој и е заложба за стабилна безбедна и одржлива иднина во однос на енергетиката, не само за двете соседни земји, туку и за целиот регион.
Задоволство изрази и Софиа Филипиду, амбасадорка на Грција, која рече дека овој важен стратешки проект обезбедува регионална енергетска безбедност, европска енергетска безбедност, енергија и поврзаност помеѓу двете држави.
На настанот присуствуваа и директорка на Националниот оператор на системот за природен гас на Грција (ДЕСФА), Мариа Рита Гали, како и директорот на Србијагас, Душан Бајатовиќ.
Изградбата ќе ја спроведе домашната компанија Рапид Билд ДОО. Градежните работи на трасата започнуваат веднаш и се очекува да завршат за 22 месеци, со што интерконекторот треба да биде целосно оперативен во текот на 2027 година.
На терен сè уште има нерасчистени парцели со експропријација и нераскинати договори за закуп на земјоделско земјиште, каде изведувачот не може да влезе да работи. Има и предели под шума за кои треба дозволи за нејзина сеча, и дрвната маса да се однесе од локацијата.